MANCINI ASEMA ANGEKUWA ANAMPIGA BALOTELLI KILA SIKU KAMA ANGEKUWA ANACHEZA NAYE

Balotelli

KOCHA wa Manchester City, Roberto Mancini anazinguliwa mno na mshambuliaji mtata, Mario Balotelli kiasi kwamba anasema kama angekuwa anacheza naye, angeishia kumpiga.

Mtaliano huyo alizungumza kabla ya skendo jipya la Balotelli kupata ajali Alhamisi akiwaambia Waandishi wa Habari kwamba hazungumzi na Mtaliano mwenzake huyo kila siku, kwa sababu kama angefanya hivyo ingebidi amuone mtaalamu wa phycholog.

Mancini, anayeiandaa timu yake kwa ajili ya mchezo wa Ligi Kuu, ambao wanatakiwa lazima washinde dhidi ya Arsenal Jumapili, amesema sasa ameona kwa nini wachezaji wenzake Balotelli wanazinguliwa naye.

"Naweza kuelewa hii. Nilimuambia kama ungecheza na mimi, miaka 10 iliyopita, ningekuwa nakupiga kichwani kila siku," alisema Mancini.

"Nawaelewa wachezaji wenzake, lakini kuna njia tofauti za kuwasaidia vijana kama Mario. Katika kila mechi kubwa, amekuwa akicheza vizuri sana. Tatizo lake ni fikrab zake mchezoni, lakini nafanya naye kazi kila siku (juu ya hilo).

"Nazungumza naye – siyo kila siku, kwa sababu ningehitaji mtaalamu wa psychology – lakini kila siku mbili nazungumza naye. Hapotezi ubora wake. Mario, kama mchezaji, anaweza kuwa mmoja (wachezaji)  babu kubwa Ulaya. Sitaki apoteze kipaji chake."

Balotelli, mwenye umri wa miaka 21, ambaye amekuwa akitawala vichwa vya habari kwa muda mrefu, aliibuka tena jana kwenye kurasa za mbele juu ya maisha yake binafsi baada ya kupata ajali akiwa anaendesha gari lake.

Mshambuliaji huyo ambaye anaendesha Bentley, alitoka salama kwenye ajali hiyo na anatarajiwa kucheza Jumapili, lakini Polisi imethibitisha abiria mmoja katika gari mbili zilizohusika kwenye ajali alipelekwa hospitali.

Taarifa kutoka Polisi ya Jiji la Manchester ilisema: "Muda mfupi baada ya saa 9.15 jioni Alhamisi, Aprili 5, 2012, polisi walipigiwa simu kuitwa  Mtaa wa Medlock, katikati ya Jiji la Manchester kuchukua taarifa ya ajali iliyohusisha gari mbili.

"Abiria mmoja kutoka kwenye gari hizo mbili alipelekwa hospitali kwa matibabu. Uchunguzi unaendelea."

Balotelli, ambaye mapema msimu huu alisababisha ajali ya moto nyumbani kwake baada ya kufungia ndani vifaa vya kudhibiti moto akiwa amevizima, amekuwa akitawala magazeti wiki mbili hizi baada ya kuibuka ghafla kwenye mkutano na Waandishi wa Habari wa klabu yake ya zamani, Inter Milan kumtambulisha kocha wake mpya.

Pia aligombana na kocha wake Mancini mazoezini mwishoni mwa wiki iliyopita, na akagombea na mchezaji mwenzake Aleksandar Kolarov kupiga mpira wa adhabu katika sare ya 3-3 waliyolazimishwa na Sunderland.

Licha ya kufunga mabao mawili siku hiyo, uchezaji wa Balotelli ulipondwa na Mancini, ambaye alisema alitaka kumtoa baada ya dakika tano tu.

Pamoja na hayo, Mancini bado ana matumaini na mchezaji huyo ambaye amekuwa akimuona tangu angali kinda kabisa Italia.

Mancini alisema: "Kuna watu ambao wanafikiri vibaya tu juu ya watu wengine, kama Mario. Kila wakati Mario kafanya kitu fulani, ni kama vita.

"Kuna watu wengine ambao ndani na nje ya Uwanja wanafanya madhambi zaidi ya Mario na hakuna hata mmoja anayesema chochote, labda kwa sababu wanachezea timu muhimu au hawako kama Mario."

Friday, April 06, 2012