KALOU: UKUTA WA BARCA KWETU UWAZI

Kalou

MSHAMBULIAJI wa Chelsea, Salomon Kalou amesema kwamba Barcelona wana udhaifu ambao timu yake itautumia itakapokutana nao kwenye Nusu Fainali za Ligi ya Mabingwa Ulaya baadaye mwezi huu.

Wachambuzi wengi wanaipa Barca nafasi kubwa ya kuifunga The Blues na kuingia fainali kwa mara ya tatu ndani ya miaka minne, lakini Kalou anasema safu ya ulinzi ya Pep Guardiola ina makosa ya kutosha kuwapa matumaini ya kuwatoa mabingwa hao watetezi.

Wakati ubora wa Barca umelalia kwa wanasoka bora duniani, Lionel Messi, Andres Iniesta na Xavi, nyota huyo wa Ivory Coast, Kalou havutiwi sana na beki nne yao.

"Wana udhaifu," Kalou alisema. "Tunafahamu hawakuwa wenye kujiamini sana katika safu ya ulinzi, wamefungwa mabao mengi, hivyo hilo ndilo jambo ambalo tutalitumia.

"Watu wanaona jinsi Barcelona inavyocheza leo na wanaweza kusema, 'Chelsea haina nafasi dhidi ya Barcelona'.

"Lakini, kama mchezaji wa Chelsea, tunajituma kila siku mazoezini na tunaamini kwamba uwanjani ndio sehemu pekee ya majibu juu ya dhana zote hasi. Mashabiki wetu wanatarajia tutashinda, tunatarajia ushindi."

Pamoja na kwamba Barcelona inapewa heshima kubwa sana Ulaya hivi sasa, Kalou anasema kushindwa kwao kumbana Jose Mourinho na timu yake  Real Madrid katika Ligi ya Hispania msimu huu, inathibitisha kwamba si wagumu.

"Kila mmoja anasahau kwamba Madrid wana msimu babu kubwa na Jose," alisema Kalou.

"Hata sasa, kama tungecheza na Madrid, watu wasingesema kwamba Chelsea haina nafasi.

"Lakini, kwa sababu ni Barca, kwa sababu wanaye Messi na wachezaji wote hao, watu wanafikiri kwamba hatutuwawezi.

"Wachezaji wa Chelsea wanafahamu kwamba huu ni mchezo mmoja, kwenye mchezo mmoja, kitu chochote kinaweza kutokea."

Kalou na wachezaji wenzake pia wameonyeaha nia ya kushinda ili kupoza machungu yao walipokutana na Barca mara ya mwisho na kufungwa kwa utata kwenye Nusu Fainali mwaka 2009.

The Blues ilistahili kupewa penalti kadhaa za wazi zilizokataliwa na refa kabla ya Iniesta kufunga bao la ushindi dakika ya mwisho.

Kalou, ambaye alikuwa benchi tu muda wote wa mchezo huo, anaikumbuka mechi hiyo vizuri sana.

Friday, April 06, 2012