INIESTA: HAKUNA SABABU YA KUTOWAFUNGA AC MILAN KWETU

Iniesta aliyemkumbatia Adriano

NYOTA wa Barcelona, Andres Iniesta anaamini kwa faieda ya kucheza nyumbani mechi ya marudiano ya Robo Fainali ya Ligi ya Mabingwa Ulaya, Barcelona watakuwa hawana sababu ya kushindwa kuwafunga AC Milan Jumanne.

Timu hizo zilitoka sare ya 0-0 Uwanja wa San Siro Jumatano baada ya mchezo mkali na wa kusisimua, ambao wenyeji walipata nafasi za wazi wakashindwa kuzitumia.
Pamoja na hayo, Iniesta anatumai kwamba itakuwa habari tofauti kwenye Uwanja wa Camp Nou akitarajia mchezo wa kushambuliana zaidi.
“Tunatakiwa kushinda, huo ndio ukweli," alisema mwanasoka huyo wa kimataifa wa Hispania baada ya Barca kushinda 2-0 katika La Liga dhidi ya Athletic Bilbao. "Tukiwa nyumbani, na mashabiki wetu, tunatakiwa kusonga mbele na lazima tuingie kwenye mechi kwa kujiamini. Tutaona dakika 90 zitakavyokuwa."
Iniesta alifunga bao la kwanza dhidi ya Athletic na mshindi huyo wa Kombe la Dunia alivutiwa na jinsi na timu yake ilivyocheza jana dhidi ya timu nzuri.
Ushindi wa Barca unamaanisha sasa imebakiza pointi sita kuifikia Real Madrid iliyo kileleni, ambayo mapema jana iliitandika Osasuna 5-1 huko Pamplona.

Sunday, April 01, 2012